年尾，忙團年。
除了屋企人，年中見得多過見屋企人的同事，都會邀請佢地團年。
團年飯，我覺得重要過好多聚會，同事們一年辛勞，一定要表達謝意。早前，同bma、香港飛馬、足總部門同事、保良局三營同事都食咗團年飯，今日到「bma老人谷」。
同一間公司做10年以上，呢啲人，一定有啲嘢，有啲好嘢；而能夠喺自己身邊10幾年的同事，一定有感情，有份好特別既感情。
Project Manager蘇蘇和Administration Manager Fannes，剛取10年老人牌，當晚頒獎佢地已經自動波好感動，眼濕濕望住我，我話得、得、得，請你地食多餐。
但其實以老鬼嚟講，佢地兩個算新丁，公司有另外6個同事一早攞咗老人牌。兩位係茶水部姐姐，做足19年；另一位係羅生司機，都係做左十幾年。
跟住就係羅生私人助理Eunice，17年。私人助理呢個位，其實超難做，尤其是當你老細係羅生。作為羅生老婆，我深知道呢個位有幾難頂，而肯定，平時好多連我都唔頂既嘢，朝9晚5都由Eunice幫我頂晒，咁多年來，我需要知既嘢，Eunice非常交帶做到足，我唔需要知既嘢，我亦絶對唔知！而我可以同Eunice由始至終相敬如賓，呢樣先至係最不可能的事實，難過同老公相敬如賓！
IT經理阿南，16年。一個office，一隊球隊，4個品牌8間outlets，幾百個同事．加埋公司無數大小projects，阿南當然忙到暈，但佢對於我呢個科技白痴非常有耐性，佢肯定係呢個世界上知道同mark低我最多password，同埋唯一可以擅改我password既人，無左佢，我咩都唔識裝，咩都搞唔掂！
Chris，16年，2000年跟我做助手，2003年加入bma，都係做我私人助手。咁多年，我做咩佢做咩，換句話講，佢成日轉行：填詞人、主持人、編劇、Marketing Director、出版社、經理人公司、足球隊、甚至保良局總理做咩，佢都要理，佢有時會同我講：「我用你助手呢個title出去傾野好似唔係咁好，不如改做ｘｘｘ」，我次次都話好，改到我都唔記得佢而家係咩title，可能個title好勁，但我都只記得佢係我最得力既助手。
蘇蘇，10年。Project Manager呢個title其實好搵笨，即係有咩project都可以叫佢做，而佢又做得咁開心咁投入，係咪抵佢做多啲先？佢對於佢有興趣既嘢，有超乎常人的組織能力，佢係早過Google出世既Google，理解廣東話最準確既Siri，但呢個都唔係佢最大優點，佢最勁既係，連無興趣既工作，佢都會搵個角度去發掘興趣，用最快方法或佢最鍾意既方法搞掂件事，呢個世界，搞得掂就得，總之佢就搞得掂啦，無左佢我就真係唔掂嘞！
Fannes，我公司好多高妹，Fannes因為高，所以我由佢做會計部文員時就認得佢，跟住佢一路升職，到有一日，公司有行政部經理空缺，羅生話升Fannes，我話：佢會計部架喎．．．羅生話：佢就係做會計部，但就咩都管，唔關佢事都管，個個同事都怕咗佢，搵佢管行政部就最好！做得老細既，梗有佢獨具既慧眼，如果Fannes留喺會計部，佢可能已經走左，因為佢既長處真係多管閒事，但佢又搞得妥妥貼貼，用會計人既精密思維，為公司著想得來，又不忘為同事謀福利，好正！
今日，老鬼團年飯，蘇蘇又話要抽獎，５個人，抽咩鬼獎，人人有獎啦！
我祝佢地喺公司長做長有，又爭取到射波放長假去旅行，咁就好嘞！
今日抽獎獎品係「老人旅遊外幣生果金」，睇下佢地幾開心！
#bma #bmastaff #oldghosts #gathering #redmr #happymoments #longservice #luckydraw
Search